taqalgani
Avtomobilni vaqtincha olib qo'yish taklifi: IIV saqlash mexanizmini qayta ko'rib chiqadi
Xavfli yo'l harakati qoidalari buzilishi uchun avtomobilni olti oydan bir yilgacha vaqtincha olib qo'yish taklif qilindi. Deputatlar jarima maydonchalari uzoq muddatli saqlashga tayyor emasligini aytdi, Ichki ishlar vazirligi mexanizmni ikkinchi o'qishgacha qayta ko'rib chiqishga va'da berdi.
Muhokama 4-avgust kuni Oliy Majlis Qonunchilik palatasida bo'lib o'tdi. Yig'ilishda deputatlar amaldagi jarima maydonchalarida mashinalarni uzoq vaqt saqlash imkoniyati yo'qligini va bunday saqlash xarajatlari huquqbuzarning zimmasiga tushishi mumkinligini ko'rsatib o'tdi. Deputat Dilmurod Ismoilov jarima maydonchalari odatda transport vositalarini qisqa muddatga saqlash uchun mo'ljallanganiga e'tibor qaratdi.
Qonun loyihasiga ko'ra, Ma'muriy javobgarlik to'g'risidagi kodeksga yangi jazo turi — avtomototransport vositasini vaqtincha olib qo'yish kiritiladi. Qoidabuzarning avtomobili yoki mototsikli sud qaroriga ko'ra olib qo'yiladi.
Hujjatda yo'l harakati xavfsizligi tizimini takomillashtirish munosabati bilan qonunchilikka o'zgartirish va qo'shimchalar kiritish nazarda tutilgan. Loyihani O'zLiDeP fraksiyasi deputatlari muhokama qilgan, bu haqda partiya matbuot xizmati xabar bergan.
Alohida norma sifatida belgilangan tezlikni 80 km/soatdan ortiq oshirganlik uchun javobgarlik joriy etilishi va bunday holatda haydovchilik huquqidan mahrum qilish ko'zda tutilgan.
Shu bilan birga, voyaga yetmaganlarga transport vositasini boshqarishni topshirish, noqonuniy poyga tashkil etish va unda qatnashish, yuk avtomobillarini tungi vaqtda xavf tug'diradigan holatda yo'l chetida qoldirish, shuningdek transport vositasini hisobdan chiqarish tartibini buzganlik uchun javobgarlikni kuchaytirish hamda bu holatlarda jarima chegirmasini bekor qilish taklif etilmoqda.
Loyiha hozircha birinchi o'qish bosqichida.