Taqalgani haqida

Taqalgani — avtomobil sotib olmoqchi, sotmoqchi yoki shunchaki o'z mashinasining bugungi qiymatini bilmoqchi bo'lgan odam uchun bitta joy. Bozordan arzon e'lonlar, har model va yil bo'yicha narx, avtobozor tahlillari, xizmatlar, yoqilg'i shoxobchalari va hujjatlar — hammasining asosida bitta narsa: har kuni yangilanib turadigan o'z e'lonlar bazamiz va undan chiqadigan raqamlar.

Bozorda e'lon ko'p, lekin qaysi narx haqiqatan arzon, mashina aslida qancha turadi va narxlar qayoqqa ketyapti — buni bilish uchun o'nlab e'lonni ko'rib chiqish kerak. Biz shuni har kuni avtomatik qilamiz va natijasini oddiy ko'rinishda beramiz.

Nimalarni taqdim etamiz

Bozordan arzon avtomobillar

Har kuni narxi o'z guruhi medianasidan sezilarli past bo'lgan e'lonlar tanlanadi va @taqalgani Telegram kanalida hamda saytning E'lonlar bo'limida chiqadi. Har bir e'lon sahifasida narx tahlili bor: bozor medianasi, e'lon narxi va ular orasidagi farq. Sotilgan e'lonlar belgilanadi — kanal postidagi tugma ham «Sotildi» ga o'zgaradi.

Model va yil bo'yicha narxlar

Har bir model sahifasida yil bo'yicha o'rta narx jadvali, har bir yilning o'z sahifasida esa o'rta narx, odatiy narx oralig'i, uzatma qutisi va viloyat bo'yicha kesim bor. Viloyat sahifalari shu hududdagi narxlarni ko'rsatadi. Narx indekslari mashhur modellarning o'rta narxi qanday o'zgarayotganini kuzatib boradi.

Tahlillar va yangiliklar

Avtobozor yangiliklari va bazamiz raqamlariga tayangan tahliliy materiallar. Tahliliy materiallar avtomatik tayyorlanadi: matndagi har bir raqam bazadagi hisob bilan tekshiriladi va har birida «Tahlil asosi» — qaysi davr va nechta e'lon asosida hisoblangani — ko'rsatiladi.

Xizmatlar

Avtoservis, moyka, tuning va ehtiyot qismlar e'lonlari bir joyda. Qidiruv lotin va kirill yozuvini bir xil tushunadi va xato yozilgan so'zni ham topadi.

Yoqilg'i shoxobchalari

Metan, propan va benzin shoxobchalari butun mamlakat bo'yicha xaritada. Joylashuvni yoqsangiz, sizga eng yaqin shoxobchalar ko'rsatiladi. Ma'lumot OpenStreetMap ochiq xaritasidan olinadi.

Hujjatlar

Majburiy sug'urta (OSAGO) narxini davlat tarifi bo'yicha hisoblash — to'liq tarif jadvali bilan. Biz to'lov qabul qilmaymiz va hujjat rasmiylashtirmaymiz — faqat hisoblab, tushuntirib beramiz.

Profil — mening avtomobilim

Model va yilni kiritsangiz, shu mashinaning bozor narxi va eng arzon e'lonlari bir joyda ko'rinadi. Shu yerdan jarimani tekshirish, sug'urta narxini bilish va mashinani sotish uchun e'lon berishga o'tish mumkin. Hujjat muddatlari (sug'urta, tonirovka, haydovchilik guvohnomasi, ishonchnoma) uchun kun sanog'i va kalendarga eslatma qo'shish bor. Texpasport faqat sizning brauzeringizda saqlanadi; avtomobil raqami ham — mashinani garajga o'zingiz qo'shmaguningizcha. Hisobga kirsangiz (Google yoki Telegram orqali), model, yil va muddatlar boshqa qurilmada ham ko'rinadi, muddat yaqinlashganda esa Telegramga eslatma keladi. Model sahifasida «Arzon e'lon chiqsa xabar ber» ni bossangiz — shu modelga kanalda arzon e'lon chiqqanda ham.

E'lon berish

Mashinangizni Telegram bot orqali sotuvga qo'yasiz: bir necha savolga javob berib, rasm yuborasiz. Bot narxni bozor bilan solishtiradi — kanal arzon e'lonlar uchun, shuning uchun narx bozor darajasidan yuqori bo'lsa, bot buni aytadi. E'lon kanalda va saytda chiqadi; xohlasangiz, saytda eng yuqorida turadigan TOP joyni ham tanlaysiz. Mashina sotilgach, uni bot orqali «sotilgan» deb belgilaysiz.

Narxni qanday tekshiramiz

1. Yig'amiz. Har soatda yangi e'lonlar o'qiladi (06:00–24:00). Kanalga faqat so'nggi 7 kunda joylangan e'lonlar chiqadi — eski e'lon odatda allaqachon sotilgan yoki narxi eskirgan bo'ladi.
2. Guruhlaymiz. Har bir e'lon o'z guruhiga tushadi: model, yil va uzatma qutisi. Guruhda kamida 5 ta e'lon bo'lishi shart, aks holda taqqoslash uchun asos yetarli emas va guruh umuman baholanmaydi.
3. Solishtiramiz. Guruh medianasi hisoblanadi va e'lon narxi shunga qiyoslanadi. Probeg farqi ham hisobga olinadi.
4. Tanlaymiz. Mediandan kamida 12% arzon bo'lganlari chiqadi.

Median qanday hisoblanadi

Median — guruhdagi narxlarning o'rta qiymati: yarmi undan qimmat, yarmi arzon. Bu o'rtacha arifmetikdan farq qiladi va ataylab tanlangan — bitta juda qimmat yoki juda arzon e'lon o'rtachani suradi, medianga esa ta'sir qilmaydi. Sayt va kanal bitta qoida bilan hisoblaydi, ya'ni bir e'lon uchun ikki joyda ikki xil «o'rta narx» chiqmaydi.

Median hisoblashda to'rt qoida bor:

• Model, yil va uzatma qutisi — alohida. Bir xil model va yil ichida avtomat uzatma mexanikadan o'rtacha 15% qimmat turadi. Bularni aralashtirsak, avtomat sun'iy "qimmat", mexanika sun'iy "arzon" bo'lib chiqadi va foizlar noto'g'ri hisoblanadi.
• Faqat so'nggi 90 kun. Undan eski e'lon bugungi bozorni ko'rsatmaydi.
• Faqat hali faol e'lonlar. Sotilmay uzoq yotgan e'lon ko'pincha qimmat bo'lgani uchun yotadi — u medianni yuqoriga suradi. Shuning uchun e'lonlarning tirikligi muntazam tekshirib turiladi va o'chirilganlari hisobdan chiqadi.
• Probeg hisobga olinadi. Guruh ichida probeg bilan narx o'rtasidagi bog'liqlik topiladi (buning uchun probegi ma'lum kamida 8 ta e'lon kerak) va e'lon shu bog'liqlikka nisbatan baholanadi. Ya'ni probegi kam mashinaning arzonligi bo'rttirilmaydi.

Nimani qilmaymiz

Xizmatning qiymati nimani ko'rsatishida emas, nimani ko'rsatmasligida ham:

• Haddan tashqari arzon e'lonlar chiqmaydi. Mediandan 40% dan ortiq past narx odatda arzon mashinadan emas, kredit qoldig'i, avariya yoki xato yozilgan narxdan darak beradi. Bunday e'lonlar filtrdan o'tkazilmaydi.
• Shubhali probeg ko'rsatilmaydi. "2020-yilgi mashina, 270 km" kabi qiymatlar ishonchsiz. Noto'g'ri raqamdan ko'ra yo'q raqam yaxshi — bunday hollarda probeg umuman yozilmaydi.
• Tanilmagan model chiqmaydi. Model nomi aniq bo'lmasa, e'lon taqqoslanmaydi ham, chiqarilmaydi ham.
• Sotilgan mashinaning raqami berilmaydi. Sotilgandan keyingi qo'ng'iroq egasini ham bezovta qiladi, xaridorning vaqtini ham oladi.
• To'lov qabul qilmaymiz, hujjat rasmiylashtirmaymiz. Hujjatlar bo'limida faqat tushuntiramiz va hisoblab beramiz.
• Texpasport brauzeringizdan chiqmaydi. U serverga yuborilmaydi va bizda saqlanmaydi — hisobga kirgan bo'lsangiz ham. Avtomobil raqami faqat mashinani garajga o'zingiz qo'shsangiz saqlanadi, uni kim ko'rishini ham o'zingiz tanlaysiz; profil sukutda ochiq, xohlasangiz yopasiz (maxfiylik siyosati).
• E'lon matni ko'chirilmaydi. Sahifadagi matn bizniki, qiymat esa narx tahlilida: bu e'lon, bozor medianasi va ular orasidagi farq.

Savol-javob

Taqalgani nima?

Avtomobil bozori uchun bitta joy: narxi bozor darajasidan sezilarli past e'lonlar, har model va yil bo'yicha narx, avtobozor tahlillari, avtomobilga oid xizmatlar, yoqilg'i shoxobchalari xaritasi va hujjatlar bo'yicha yordam. Hammasining asosida o'z e'lonlar bazamiz va undan chiqadigan raqamlar.

Arzon e'lon qanday tanlanadi?

Har bir e'lon o'z modeli, yili va uzatma qutisi bo'yicha guruhlanadi va guruh medianasi bilan solishtiriladi — so'nggi 90 kundagi va hali faol e'lonlar asosida, probeg farqi bilan. Mediandan kamida 12% arzon bo'lganlari chiqadi. Guruhda kamida 5 ta e'lon bo'lmasa, taqqoslash umuman qilinmaydi.

«Bozordan 20% arzon» nimani anglatadi?

E'lon narxi o'z guruhining medianasidan 20% past ekanini. Median — narxlarning o'rta qiymati: yarmi undan qimmat, yarmi arzon. O'rtacha arifmetikdan farqli, unga bitta chetdagi narx ta'sir qilmaydi.

Nega juda arzon e'lonlar ko'rinmaydi?

Mediandan 40% dan ortiq past narx odatda arzon mashinadan emas, kredit qoldig'i, avariya yoki xato yozilgan narxdan darak beradi. Bunday e'lonlar ataylab o'tkazilmaydi.

Mashinam qancha turadi?

Model sahifasida yil bo'yicha o'rta narx jadvali bor, har bir yilning o'z sahifasida esa o'rta narx, odatiy narx oralig'i, uzatma qutisi va viloyat bo'yicha kesim. Profilda model va yilni kiritsangiz, bozor narxi va shu mashinaning eng arzon e'lonlari bir joyda ko'rinadi.

Telefon raqami nega darrov ko'rinmaydi?

Biz topgan e'lonlarda raqam kanaldagi post ostidagi tugma ortida turadi va kanalga a'zo bo'lganlarga ko'rinadi. Mashina sotilgan bo'lsa, raqam berilmaydi — qo'ng'iroq baribir ma'nosiz. Egasi o'zi joylashtirgan e'lonlarda raqam saytda ochiq bo'lishi mumkin — buni egasining o'zi tanlaydi.

E'lon qanday beriladi?

Telegram bot orqali: bir necha savolga javob berasiz, rasm yuborasiz. Shartlar botning o'zida ko'rsatiladi. Agar so'ragan narxingiz bozor darajasidan yuqori bo'lsa, bot buni aytadi — kanal arzon e'lonlar uchun. Xohlasangiz, e'lon saytda eng yuqorida turadigan TOP joyni ham tanlash mumkin.

Mashina sotilsa nima bo'ladi?

E'lon egasi bot orqali uni sotilgan deb belgilaydi: sahifa qoladi, lekin e'lon bosh sahifadan tushadi va «sotilgan» deb ko'rsatiladi. Biz topgan e'lonlarda esa manbadagi e'lon o'chirilgani muntazam tekshirib turiladi, kanal postidagi tugma ham «Sotildi» ga o'zgaradi.

Profildagi ma'lumotlarim qayerda saqlanadi?

Avtomobil raqami va texpasport — faqat sizning brauzeringizda, serverga yuborilmaydi. Model, yil va hujjat muddatlari ham brauzerda qoladi; faqat hisobga kirsangiz, ular hisobingizda saqlanadi — boshqa qurilmada ko'rinishi va muddat yaqinlashganda Telegramga eslatma kelishi uchun. «Jarimani tekshirish» tugmasi telefoningizning SMS ilovasini rasmiy xizmat raqamiga ochadi. Eng yaqin yoqilg'i shoxobchasini topish uchun joylashuvingiz taxminiy holda yuboriladi va faqat javob hisoblanadi — hech qayerga yozilmaydi.

Yoqilg'i shoxobchalari ma'lumoti qayerdan?

OpenStreetMap ochiq xaritasidan: metan, propan va benzin shoxobchalari butun mamlakat bo'yicha. Ma'lumot biz tomonimizdan tekshirilmagan — borishdan oldin shoxobcha ishlayotganiga ishonch hosil qiling.

Saytda qanday statistika yig'iladi?

Qaysi sahifalar ochilgani, qaysi e'lon va modellar ko'rilgani, saytga qayerdan kelingani — brauzeringizga berilgan tasodifiy raqam bilan, ismingizsiz. Bu saytni yaxshilash uchun kerak. Sahifa pastidagi xabarda «Rad etish» ni bossangiz, hech narsa yig'ilmaydi. Batafsil — Maxfiylik siyosati sahifasida.

Tahliliy materiallarni kim tayyorlaydi?

Tahliliy materiallar va narx indekslari bizning e'lonlar bazamiz raqamlari asosida avtomatik tayyorlanadi. Matndagi har bir raqam bazadagi hisob bilan tekshiriladi, har bir materialda esa «Tahlil asosi» — qaysi davr va nechta e'lon asosida hisoblangani — ko'rsatiladi.

Ma'lumot qayerdan olinadi?

Ochiq e'lon maydonchalaridagi e'lonlardan. E'lon matni ko'chirilmaydi — sahifadagi matn bizniki, qo'shgan qiymatimiz esa narx tahlilida: bu e'lon, bozor medianasi va ular orasidagi farq.